दुहुँ गाउँपालिकाका स्थित पिपलचौरी माध्यमिक विद्यालय विणमा दुहुँको शिक्षा सुधारको लागि शैक्षिक अन्तरक्रिया गरिएको छ ।

दुहुँ गाउँपालिका शिक्षा युवा तथा खेलकुद शाखाको आयोजनामा शैक्षिक गुणस्तर सुधारका लागि जनप्रतिनिधि, शिक्षा शाखा, विद्यालय व्यवस्थापन समिति, शिक्षक अभिभावक र विद्यार्थीको उपस्थितिमा अन्तरक्रिया भएको हो ।

दुहुँ गाउँपालिकाका शिक्षा शाखा प्रमुख लोकेन्द्रबहादुर बमका अनुसार कार्यक्रममा सहभागी अभिभावक र विद्यार्थीहरुले विद्यालय शिक्षा सुधारका लागि सुझाव पेश गर्ने गरेका छन् ।

विद्यालयका प्रधानाध्यापक राजेन्द्रसिह बोहराले विद्यालयको वर्तमान अवस्था र नतिजा सुधारका लागि विद्यालयले चालू शैक्षिक सत्रमा सञ्चालन गरेका प्रयासहरुबारे जानकारी गराएका छन ।

पिपलचौरी माध्यमिक विद्यालय बिणका शिक्षक अभिभावक संघका सदस्य अमरबहादुर बमको अध्यक्षतामामा सञ्चालन गरिएको कार्यक्रममा दुहुँ गाउँपालिका अध्यक्ष नरेन्द्रबहादुरसिंह बडालको प्रमुख आतिथ्यता रहेको थियो ।

अन्तरक्रियालाई सम्बोधन गर्दै दुहुँ गाउँपालिका अध्यक्ष नरेन्द्रबहादुर सिंह बडालले निर्वाचित भएपछि शिक्षा क्षेत्रलाई पहिलो प्राथमिकतामा राखी कक्षा १० सम्मको शिक्षा पुर्णरुपमा निशुल्क गरेको, बिषयगत र कम्प्युटर शिक्षकको व्यवस्था गरेको र पालिकास्तरीय परीक्षा सञ्चालन गरि सिकाइमा सुधार गर्ने नीति ल्याएको बताए ।

अन्तरक्रिया पछि भेलाले आगामी दिनमा अभिभावकले विद्यार्थीहरुलाई नियमितरूपमा विद्यालय पठाउनुपर्ने, अनुपस्थित विद्यार्थीबारे जानकारी गराउने, विद्यार्थीलाई मोबाइल पूर्णरूपमा प्रतिबन्ध गराउने, गृहकार्य नियमित दिने र चेकजाँच गर्ने निर्णय गरेका छन् ।

त्यस्तै विद्यालय अनुगमनलाई प्रभावकारी बनाउने, नतिजा सुधारका लागि फागुनको महिनाभरि कोर्स रिभिजन तथा नमूना प्रश्नपत्र हल गराउने र विद्यालयले बोलाएको बेला अभिभावकहरुले अनिवार्य रुपमा उपस्थित हुनुपर्ने सामुहिक प्रतिबद्धता गरिएको शिक्षा शाखा प्रमुख वमले जानकारी दिए ।

शाखाले पालिकाभरिका पाँचवटै माध्यमिक विद्यालयमा शैक्षिक अन्तरक्रिया गरेको छ ।